आज सेप्टम्वर ११ को स्मरण गरिँदै, वल्र्ड ट्रेड टावरमा हजारौंको सहभागिता हुने अपेक्षा


न्यूयोर्क, २६ भदौ – अमेरिकाले विनासकारी आँधीको सामना गरिरहेकै वेला १६ बर्ष पहिले अमेरिकी भूमिमा भएका त्रासदीपूर्ण आक्रमणको स्मरण गरेको छ । आतङ्ककारी हमलाको दुखद घटनालाई अमेरिकीहरूले इतिहासमै भएको त्रासदीपूर्ण आक्रमणका रूपमा स्मरण गर्दै आएका छन् । अमेरिकाको पेन्टागन तथा सानक्सभिल पेनसिल्विनियामा सन् २००१ को सेप्टेम्बर ११ मा भएको उक्त आक्रमणमा आतङ्ककारी समूहले विमान अपहरण गरी विशाल टावरहरूमा ठोक्काउँदा झण्डै तीन हजार नागरिकले ज्यान गुमाएका थिए ।

उक्त दुखद दिनको स्मृतिमा घटनामा परी दिवङ्गत भएका अमेरिकी तथा विदेशी नागरिकले अमेरिकाको प्रसिद्ध वल्र्ड ट्रेड सेन्टरमा हजारौँको सङ्ख्यामा जम्मा भई मृतकप्रति श्रद्धासुमन अर्पण गर्ने तयारी भएको छ । उक्त स्थानमा भेला भई मृतकलाई सम्झिने र उनीहरूको आत्माको चीर शान्तिका लागि कामना गर्ने परम्परा नै वनिसकेको छ । स्मृति सभामा जम्मा हुने जनमानसले मृतकको नाममा प्रार्थना गर्दै एक मिनेटसम्म मन्द घण्टीका साथमा मौनधारण गर्ने परम्परा बनिसकेको छ । सेप्टेम्वर ११ भएका दुई विशाल आक्रमणको स्मरणस्वरुप रातभर दुई चम्किला बत्ती बालिने गर्छ ।

ट्रम्प तथा मेलानिया पनि सहभागी हुने 

न्यूयोर्कका स्थानीय तथा वर्तमान अमेरिकी राष्ट्रपति डोनल्ड ट्रम्पले अमेरिकी राष्ट्रपतिका रूपमा पहिलोपटक स्मृतिसभामा सहभागी हुने कार्यक्रम छ । राष्ट्रपति ट्रम्पले पहिलो विमान गगनचुम्बी भवनमा ठोक्काइएको समयमै हुने मौनसभामा सहभागी हुने कार्यक्रम छ ।
उहाँसहित उपस्थित हजारौ अमेरिकीलाई राष्ट्रपति पत्नी मेलानिया ट्रम्प पनि स्मृतिसभामा सहभागी हुने कार्यक्रम छ ।

सानक्सविलमा पनि कार्यक्रम

रक्षा मन्त्री जिम म्याटिस तथा अमेरिकी सेनाका अध्यक्ष जोसेफ डनफोर्डले सानक्सविलमा छुट्टै कार्यक्रमको आयोजना गरी घटनामा शाहदत प्राप्त गरेका पीडितका आफन्तजनलाई स्थानीय समय अनुसार मङ्गलबार विहान ९ बजे देखि ११ बजेसम्म स्मरणसभामा सहभागी गराउने कार्यक्रम छ । अमेरिकी उप राष्ट्रपति माइक पेन्स तथा अमेरिकी आन्तरिक मामिला मन्त्री रायन जिन्कले मृतकको सम्झनामा मन्तव्यसमेत दिने कार्यक्रम छ

ट्रम्पद्वारा एक मिनेट मौनधारण

अमेरिकी राष्ट्रपति डोनल्ड ट्रम्पले अमेरिकी इतिहासमै दर्दनाक घटना मानिएको सन् २००१ को सेप्टेम्वर ११ मा भएको घटनालाई राष्ट्रपतिका रूपमा सोमबार वासिङ्टनमा आयोजित कार्यक्रममा सहभागी हुनुभएको छ । भण्डै तीन हजार अमेरिकी तथा विदेशी नागरिकको मृत्यु हुनेगरी गरिएको आक्रमणमा निधन भएका नागरिकको सम्झनामा वासिङ्टन, न्यूयोर्क, म्यानह्याटन लगायतका ठाउँहरूमा कार्यक्रम गरिएको अमेरिकी सञ्चारमाध्यमले जनाएका छन् ।

वासिङ्टनमा भएको कार्यक्रममा राष्ट्रपति ट्रम्प तथा उहाँकी धर्मपत्नी मेलानियाले आफ्नो छातीमा हात राखी टाउको निहुराएर मन्द घन्टीको तालमा आक्रमणमा ज्यान गुमाएका नागरिकलाई सम्मान व्यक्त गर्नुभएको थियो । सोह्रबर्ष पहिले अमेरिकाका छुट्टाछुट्टै स्थान पेन्टागन तथा पेनसिल्विनियामा अलकायदा समूहले विमान अपहरण गरी गरेका आक्रमणमा परी दुई हजार ९९७ जनाले ज्यान गुमाएका थिए । रक्षा मन्त्री जिम म्याटिस तथा अमेरिकी सेनाका अध्यक्ष जोसेफ डनफोर्डले सानक्सविलमा छुट्टै कार्यक्रममा सहभागी बनी घटनामा शाहदत प्राप्त गरेका पीडितप्रति सम्मान व्यक्त गर्नुभएको छ ।

यसमा तपाइको मत