व्यक्तिको खातामा नेपाल इन्जिनियरिङको पैसा

वार्षिक डेढ करोड रुपैयाँ विद्यार्थी संगठनका नाममा बाँड्ने निर्णय



काठमाडौं, मंसिर १३ । भक्तपुरको चाँगुनारायणस्थित नेपाल इन्जिनियरिङ कलेजको खाताबाट सञ्चालकहरूको खातामा ठूलो परिमाणमा रकम हस्तान्तरण भएको भेटिएको छ। कलेजस्रोतले उपलब्ध गराएको विवरण हेर्दा १० करोड रुपैयाँभन्दा बढी रकम अनियमित रूपमा व्यक्तिको खातामा गएको देखिन्छ।

‘कलेजको खाताबाट केही सञ्चालकको खातामा बारम्बार रकम निकासा गरेको देखिन्छ,’ कलेजस्रोतले भन्यो, ‘तलब र अन्य सुविधाबाहेक विभिन्न शीर्षकमा खर्च देखाई रकम निकालिएको छ।’ सादा कागजमा विवरण लेखेर कतिपय खर्चको औचित्य पुष्टि गर्न खोजिएको स्रोतले बताएको खवर आजको कान्तिपुर दैनिकले छापेको छ ।

जनसम्पर्क र विद्यार्थी संगठनका नाममा खर्च देखाइएको छ। विद्यार्थी संगठनलाई बाँडेको भनी ८ करोड २५ लाख रुपैयाँ खर्च देखाइएको छ। ‘तर भर्पाइ र रसिद भने लेखाको कागजातमा देखिँदैन,’ स्रोतले भन्यो। कलेज सञ्चालक समितिका तत्कालीन अध्यक्ष लम्बोदर न्यौपानेका नाममा पटक–पटक गरी ८ करोड २१ लाख रुपैयाँ भुक्तानी भएको छ।

नियमित तलबबाहेक उनले जनसम्पर्क, यातायात र अन्य खर्चका नाममा भुक्तानी लिएका छन्। अर्का सञ्चालक लवराज भट्टराईले २ करोड ३२ लाख रुपैयाँ निकासा लिएको लेखास्रोतले बतायो।

सञ्चालकहरू उपेन्द्र गौतम र सूर्यबहादुर केसीका नाममा भएको भुक्तानीसमेत २/२ करोड रुपैयाँ नाघेको देखिन्छ।

सामाजिक संस्थाका रूपमा सञ्चालित कलेजका सञ्चालकहरूले आफूहरूलाई डेढ-डेढ करोड रुपैयाँ बाँड्ने विवादास्पद निर्णय गरेका थिए। हरि पाण्डे र दीपक भट्टराईबाहेक सबै सञ्चालकले उक्त रकम बुझिसकेको स्रोतले जनायो। कलेजलाई निजीकरण गरी कम्पनीमा परिणत गर्ने प्रयास भने चौतर्फी विरोधपछि असफल भएको छ।

कलेजस्रोतबाट प्राप्त कागजातमा खातामा रहेको रकममध्ये विभिन्न शीर्षकमा सञ्चालकहरूलाई सुविधा दिने भनी विवादास्पद निर्णय भएको देखिन्छ। अध्यक्षले वार्षिक डेढ करोड रुपैयाँ विद्यार्थी संगठनका नाममा बाँड्ने निर्णय गराएका छन्। ‘उक्त खर्चको स्रोतसमेत पेस गर्न नपर्ने भनी विवादास्पद निर्णय भएको छ,’ स्रोतले भन्यो। कलेजमा १५ करोड रुपैयाँ उठाउन बाँकी रहेकाले त्यसका लागि १५ प्रतिशत रकम खर्च लाग्ने भन्दै करिब २ करोड २५ लाख रुपैयाँको हिसाब नै देखाउन नपर्ने भनी खर्च गरिएको स्रोतले बतायो।

कलेजका अध्यक्षका लागि कलेजको विकास र सञ्चालनका नाममा मासिक पारिश्रमिक ५ लाख रुपैयाँ दिने बोर्डले निर्णय गरेको छ। अरू सञ्चालकले मासिक १ लाख २५ हजार रुपैयाँ सुविधा लिइरहेका छन्। त्यसबाहेक अध्यक्षको परिवार अस्ट्रेलियामा रहेको भन्दै वार्षिक रूपमा तीन पटक अस्ट्रेलिया जानेरआउने सुविधा दिने गरेको स्रोतले जनायो। ‘उहाँ मात्रै होइन, श्रीमतीलाई समेत आउनजान सुविधा दिइएको भेटियो,’ स्रोतले भन्यो।

सञ्चालकमध्येका हरि पाण्डेले विभिन्न नाममा कलेजबाट सञ्चालकहरूले सुविधा लिएको बताए। ‘सुरुमा झुक्किएर मैले पनि सामाजिक संस्थाकै नाममा सुविधा लिएको थिएँ,’ पाण्डेले  भने, ‘यथार्थ थाहा पाएपछि मैले ब्याजसहित रकम फिर्ता गरेको छु। अन्य सञ्चालकले पनि रकम फिर्ता गर्नुपर्छ।’ उनका अनुसार सबै सञ्चालकलाई रकम फिर्ता गर्न पत्र काटिएको छ। केही अवधिको कागजात हेर्दा सबै सञ्चालकले मासिक सुविधा लिएको कलेज स्रोतले बतायो।

समाजकल्याण परिषदका प्रवक्ता बोधराज दाहालका अनुसार सामाजिक संस्थाका कर्मचारीबाहेकले पारिश्रमिक र सुविधा लिनु गैरकानुनी मानिन्छ। ‘कुनै व्यक्ति कर्मचारीका रूपमा रहेको छ भने त्यो अवधिमा ऊ सञ्चालक हुन पाउँदैन,’ दाहालले भने, ‘सामाजिक संस्थाका पदाधिकारीले नियमित पारिश्रमिक वा सुविधा लिनु त सरासर आर्थिक अनियमितता हो।’ जिल्ला प्रशासन कार्यालय भक्तपुरमा दर्ता भएको नेपाल इन्जिनियरिङ कलेज हालसम्म पनि सामाजिक संस्थाकै रूपमा सञ्चालित छ।

गैरनाफामूलक संस्था भएकै कारण कलेजले साबिकको गाविसबाट स्वीकृति लिएर भक्तपुरको चाँगुनारायणमा १ सय ७४ रोपनी सरकारी जग्गामा भौतिक संरचना बनाएको छ। कलेजको आफ्नै भने ३९ रोपनी जग्गा मात्रै छ। कलेजको सञ्चालकमध्येका एक र हाल कार्यवाहक अध्यक्ष बनेका सूर्यबहादुर केसीले कलेजका अध्यक्षलाई पत्र पठाई गैरसरकारी संस्थाका रूपमा स्थापित कलेजलाई निजी कम्पनीमा रूपान्तरण गर्नुपर्ने भनी सोझै प्रस्ताव गरेका थिए।

कलेजमा हाल करिब २ हजार विद्यार्थी अध्ययनरत छन्। पोखरा विश्वविद्यालयबाट सम्बन्धन लिई स्नातक र स्नातकोत्तर तहमा विभिन्न कार्यक्रम सञ्चालन गरेको कलेज पुल्चोक इन्जिनियरिङपछि आकर्षक मानिन्छ।

यसमा तपाइको मत