सकियो ओली–प्रचण्डबीचको वान टु वान वार्ता, भोलि एकता समितिको बैठक


काठमाडौं, वैशाख ३ । एकता  प्रक्रियामा देखिएको असमझदारी हटाउन प्रधानमन्त्री तथा एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ बीच बालुवाटारमा ‘वान टु वान’ बार्ता भएको छ ।

दुई नेताको २ घण्टा लामो छलफलपछि मंगलबार बिहान पार्टी एकता समितिको बैठक बोलाउने सहमति भएको छ । नेताहरुबीच एकतामा देखिएका विवादबारे छलफल भएपनि कुनै सहमति हुन नसकेको बताइएको छ ।

बैठकपछि माओवादी केन्द्रका अध्यक्ष प्रचण्डका प्रेस सल्लाहकार बिष्णु सापाकोटाले भोलि विहान ९ नौ बजे बस्ने पार्टी एकता संयोजन समितिको बैठकमा विवादित विषयमा छलफल गर्ने दुबै नेता सहमत भएको बताए ।

अध्यक्ष प्रचण्ड र प्रधानमन्त्री ओलीबीच यसअघि सहमति हुन नसकेका विषय एकीकृत पार्टीमा कुन पार्टीका कति सदस्य रहने, निर्वाचन चिन्ह के बनाउने र विधानको प्रस्तावनामा जनयुद्ध शव्द राख्ने कि नराख्ने भन्नेमा छलफल भएको प्रधानमन्त्री ओलीका प्रेस संयोजक चेतन अधिकारीले बताए ।

यसअघि यी विषयमा कार्यदलस्तरमा सहमति नजुट्दा शीर्ष नेतालाई सहमति गर्ने जिम्मेवारी दिइएको थियो । तर, विवादित विषयमा ओली र प्रचण्डबीच छलफल नै हुन सकेको थिएन । जसले गर्दा एकतामा अन्यौल थपिदै आएको थियो । यहि अन्यौल चिर्न दुई नेताबीच सोमबार वान टु वान वार्ता भएको हो ।

सोमबारको दुई नेताबीचको छलफलपछि पार्टी एकतामा ‘बे्रक थु्र’ हुने माओवादी नेता अग्नी सापकोटाले बताए ।

नेतहरुबीच एकीकृत पार्टीको केन्द्रीय समिति २९९ सदस्यी बनाउनेमा सहमति भएपनि कुन पार्टीबाट कति जना रहने भन्ने मिलाउन कठिन छ । माओवादीमा झण्डै ४५ सय केन्द्रीय नेता छन् । ‘पार्टी एकताबारे कार्यदलस्तरमा सहमति भएका र नभएका विषयमा समेत शीर्ष तहमा झण्डै दुई सातायता छलफल हुन सकेको थिएन । जसले एकता प्रकृयामै प्रश्न उठन लागेको अवस्थामा दुई नेताबीचको भेटवार्ताले अर्थ नराख्ने कुरा नै हुदैन’ नेता सापकोटाले भने ।

दुई नेताबीच प्रधानमन्त्री निवास बालुवाटारमा सोमबारको वान टु वानपछि मंगलबार पार्टी एकता संयोजन समितिको बैठक बस्ने र त्यहि बैठकमा सहमतिको प्रयास हुने एमाले नेता सुवास नेम्वाङले बताए ।
यसअघि आइतबार अध्यक्ष प्रचण्ड सुकुटे गएपछि प्रधानमन्त्री ओली र माअ‍ेवादी नेता नारायकाजी श्रेष्ठबीच बालुवाटारमा पार्टी एकतामा देखिएका विवादबारे छलफल भएको थियो ।

कम्युनिष्ट पार्टी स्थापना दिवसको अवसर पारेर आगामी ९ गते पार्टी एकता गर्ने घोषणा गरेका छन् । दुवै दलले अधिकांश बिषयमा सहमति बनिसकेको दाबी गरेपनि नेताहरुको व्यवस्थापन र निर्वाचन चिन्ह र जनयुद्ध शव्दमा कुरा नमिल्दा पछिल्लो समय एकता समितिको बैठक नै बस्न सकेको थिएन ।

पार्टी एकतामा विकसित घटनाक्रमहरुः 
बैशाख ४–बालुवाटारमा ओली–प्रचण्ड ‘वान टु वान’ वार्ता ।
बैशाख ३– ओली प्रचण्डबीच हुने भनिएको वान टु वान वार्ता, स्थगित, प्रचण्ड सुकुटे प्रस्थान ।
चैत २७ र २८– एकता संयोजन समितिको बैठक बोलाएर स्थगित  ।
चैत २५– प्रधानमन्त्री केपी ओली भारतभ्रमणबाट स्वदेश फिर्ता ।
चैत २२–कार्यदलको प्रतिवेदन शीर्ष नेतासमक्ष औपचारिक पेश, अघिल्लो सहमतिअनुसार बैशाख नौ गते काठमाडौमा भव्य सभा गरी पार्टी एकता गर्न सहमत ।
चैत २०– छुट्छुट्टै कार्यदलको सुझावका आधारमा बैशाख ९ अर्थात अप्रिल २२ मा पार्टी एकता गर्न दुवै दल सहमत ।
चैत १५–प्रधानमन्त्री ओलीको भारत भ्रमणअघि नै एकता गर्ने प्रस्तावमा गृहकार्य नपुगेको ओली तीन दिने भारत भ्रमणमा जाने र पछि छलफल गर्ने सहमति ।
चैत १२–माओवादी प्रचण्डद्धारा प्रधानमन्त्री ओलीसमक्ष एकीकृत पार्टी कमिटिमा दुवै पक्षका बराबरी संख्यामा नेता कार्यकर्ता समेट्न प्रस्ताव ।

माओवादी केन्द्र
३,९९९ जना केन्द्रीय सदस्य
३९९ जना पोलिटव्युरो सदस्य
३४ जना स्थायी समिति सदस्य
एमाले 
१९८ केन्द्रीय सदस्य
५९ पोलिटव्युरो सदस्य
२६ स्थायी समिति सदस्य

यसमा तपाइको मत